“சாமிக்கு மொட்டை போட்டு நேர்த்திக்கடன் செஞ்சுட்டேன்” என்று பலரும் கூறுவதை கேட்டிருப்போம். முடி காணிக்கை என்பது பல காலமாக பின்பற்றப்படும் ஒரு பழக்கம். பொதுவாக இது ஒரு வேண்டுதலை நிறைவேற்றியதற்காக நன்றிக் கடனாக பார்க்கப்படுகிறது. ஆனால், உண்மையில் முடி காணிக்கை என்பது வெறும் சடங்கை தாண்டிய ஆழமான அர்த்தங்களை கொண்டது என்பது பலருக்கு தெரிவதில்லை.
புராண இதிகாசங்களில், முடி காணிக்கை மரணத்திற்கு சமமாக கருதப்பட்டிருக்கிறது. மகாபாரத கதையில், அஸ்வத்தாமன் செய்த தவறுக்கு தண்டனையாக அவரது முடியை மழிக்கும்படி கிருஷ்ணர் கூறுகிறார். தலையை எடுப்பதை விட, சிகையை மழிப்பதே மரணத்திற்கு ஒப்பானது என்று அவர் கருதினார். பண்டைய காலங்களில் தவறு செய்தவர்களை மொட்டை அடித்து ஊர்வலம் போக செய்ததும், அவர்களை சமூகத்தில் இருந்து ஒதுக்கி வைக்கும் ஒரு தண்டனையாகவே பார்க்கப்பட்டது. இதன் மூலம், முடி மழித்தல் என்பது கௌரவ குறைவு மற்றும் ஒருவிதமான மரண வேதனையை தரக்கூடியது என்பதை உணரலாம்.
ஆன்மீக ரீதியாக பார்த்தால், தலைமுடி என்பது கர்ம வினைகளின் சுமையை சுமந்து செல்வதாக நம்பப்படுகிறது. கிரகங்களின் தாக்கம் மோசமாக இருக்கும் நேரங்களில் அல்லது மரண பயம் சூழ்ந்திருக்கும் போது, குலதெய்வத்திற்கு முடி காணிக்கை செலுத்துவது ஒரு பரிகாரமாக கருதப்படுகிறது. இதனால், தலைக்கு வந்த ஆபத்து தலை முடியோடு போயிடும் என்பது நம்பிக்கை. பிறக்கும் குழந்தைகளுக்கு மொட்டை போடுவது கூட, அவர்களை தீய சக்திகளில் இருந்து காப்பதாகவும், அவர்களின் தலையெழுத்தை மாற்றுவதாகவும் நம்பப்படுகிறது.
விஞ்ஞான ரீதியாக மொட்டை போடுவதில் சில நன்மைகள் உள்ளன. குழந்தைகள் கருவில் இருக்கும்போது அவர்களின் உடலில் உள்ள கழிவுகள் தலைமுடி வழியாக வெளியேறும் என்று கூறப்படுகிறது. எனவே மொட்டை போடுவதன் மூலம், குழந்தைகளின் உடல் சுத்தமாவதாகவும், நோய் தொற்று அபாயம் குறைவதாகவும் விஞ்ஞானிகள் கூறுகின்றனர். மொத்தத்தில், மொட்டை போடுதல் என்பது உடல் மற்றும் ஆன்மீக ரீதியாக ஆரோக்கியம் தரும் ஒரு செயலாக பார்க்கப்படுகிறது.
முடி காணிக்கை என்பது வெறும் நேர்த்திக்கடன் செலுத்தும் சடங்கு மட்டுமல்ல. அதில் வரலாற்றுப் பின்னணி, ஆன்மீக தத்துவம் மற்றும் அறிவியல் காரணங்களும் அடங்கி உள்ளன. சமூகத்தில் இருந்து ஒதுக்கி வைக்கும் தண்டனையாகவும், ஆபத்தில் இருந்து காக்கும் பரிகாரமாகவும், உடல் ஆரோக்கியம் பேணும் வழியாகவும் முடி காணிக்கை பார்க்கப்படுகிறது. எனவே, மொட்டை போடுதல் பழக்கத்திற்கு பின்னால் இருக்கும் ஆழமான அர்த்தங்களை உணர்ந்து, அதன் உண்மையான பலனை பெறுவோம்.
